اهل الزقاير - بدر الصقري

مرت علي ايام و ليال وشهور
 والبال عن بعض السواليف عايف

ياطول صبري والبلا داخل الزور
صبرً جميل ولا عليّه حسايف

لعبت فيني يازماني كما الكور
لاتحسبني يازمن منك خايف  

تسهر عيوني لين مايبدي النور
اذكر زمانٍ  يوم كنا ولايف

 امثل البسمات واطبق الدور
واقول كايف لو ماني بكايف.

والنوم فارقني وانا منك مقهور
واعلي واصيّح  فوق روس النوايف  

واناظر العربان ب احساس وشعور
 واجّر موالي لزين الوصايف

ياعاذلي لاتقول ماني بمعذور
 مادام ماتدري انا ويش شايف.

 هي حور والا ماهي بوصفها حور
بس الوكاد ان الردايف ردايف 

واقول تال الهرج للحب طابور
  واهل الزقاير ما تود القطايف 

© 2024 - موقع الشعر