اهل الحكي

زاد الحكي في هالزّمن هرجٍ تِلوّن بالغرور
كلّ(ن) و له فُسحة حكي يَنثِر عليها مَنطِقه

حرفٍ ينيشن و القلم يقطع مسافاته سطور
يبسِط من ألفاظه فِراش اللي يدوسه زحلقه

يَذبح و يسفك في البشر ينثر من اضغانه شرور
تصويب جاري و الهدف افكار في ظنه (إ)غلقه

يَطلِق جماحه و الحبر يخفي باعماقه ضمور
حصري على ارض القلم عرضٍ مفاده (طقطقه)

المعضلة لمحة بصر شيّد بِها أعلى قصور
و البيت لأبيض لو يبي بأرض العقارب يحرقه

و الصّين لو وده ايغزي يرسل لها أسراب الصّقور
و الهم لو ضَيّق عليه ابلا فِصالٍ يخنقه

يَفزع و لكِن فزعته للّي تِملّاه الفجور
يَجعله شيخٍ للورع سَمح المزايا مُطلقَه

يعني إذا قلنا الكذب الباب لأوّل للحضور
صاحب مزاييف الورق يحيي و يفني بورقه

ضاعت موازين الأمل لا صار اقصاها شعور
انك بهالدّنيا ملك من خالفك للمشنقه

ساري بتعريف الأمم من يعترض سير النمور
انسان بالفطره (---) و اللي يجامل تعتقه

غلطة مفاهيمن سرت كذبن وصارت له جسور
اسودّ عالمنا أثر غَيبة شموسٍ مشرقه

إرصف و لوّن هَرجِتك تِلقى ميادينك زُهور
اصدق حروفك ما تِحس الّا بجوف المحرقه

عايِن و شوف اللي جرى الحِزن يستعمر صدور
أزمة كلامٍ انتجت شعبٍ سَهاله تسرقه

ما عاد ينفعنا صبر ما عاد ترضينا جحور
لا صار بين الناس فرق الكون كلّه تفرقه

زاد الحكي اثر الحكي أزيَن لأصحابه يغور
أحلى بشف اللي غدا عرف المِجامل منطقه

خَل الكلام اللي كتب لا هاج من حلقه يثور
موجٍ و يلطم مركبه يالله بعونك تغرقه