شبّيت ناري بالدفاتر والاقلام

لـ ، ، في غير مُحدد، آخر تحديث :

شبيت ناري بالدفاتر والاقلام
مع سابق الإصرار والقلب ناوي

وش فايدة شعري وقولي والالهام
اللي عطيته من ضمير(ن)نقاوي

كني كتبته في سجلات الاوهام
لى صار صاحبنا بعيد(ن) جلاوي

جبت القصايد لجل طاريه خدّام
واوقّع اشعاري بإسم المخاوي

لنّي مخاوي الهم ومخاوي الاحلام
ومخاوي الحظ الردي والبلاوي

والديرة اللي ودّها حروة ايام
لجله أعدّيها واجدّ الخطاوي

كم مر قدامي حواري وأريام
طب الذي ما قد لقاله مداوي

ألا بشوفه ما عرفت التبسام
وألا على كيفه شربت القهاوي

واليوم عصفور التواديع حوّام
رفرف على راسي يزج الغناوي

سجيت من مجلس به الناس لوّام
كنه على صدري مخالب نداوي

قلبي تغداه وحمد ربه وقام
واللي بقى مني تعشاه واوي

غلطان يومنّي همت فيهم هيام
واللي تمنيته قليل الرجاوي

ياما على صدري أبنّيله خيام
خليت قلبي يدهكه بالحذاوي

واليوم انا ندمان واعض الابهام
من تجربة عمر(ن) قضيته عماوي

.....................................
......................................

يقول ماجد الزيد:
....

لله فلا تنضام والعلم قدّام
حرّن واعرْفك ! خل عنْك الشكاوي

ومن لا يعرْف العزّ ! ما يعرف الشّام
ولا جال في حمص الخوالد ضحاوي

دامك ولد خالد وسمّوك دحّام
والله لترقى ما يردّيك غاوي


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر