آخر احلام الشتا أول مصيفي
 يمسي يوم .. ياتي ليل
 لا سموم الريح تصحا
 ولا يوعي سطوة القيظ بطريقي
 كان صيف ... كان حلم ....!
 كنت انا والليل وانته
 وكنت أنا وحدي اللي اسمعك
 والله اسمعك
 بس ما دري وش تقول
 ها البحر يشهد ويدري
 إني ما علم وش تقول
 ها البحر يشهد ويدري
 إني ما علم وش تقول
 واني ما حفظ من حديثك غير صوتك
 والكلام اللي تقوله لو هو أحلى ما يكون
 مغيبة كنت آنه عنه..
 وحده صوتك نثر الورد بمكاني
 والتفت إلا الجزيره بلون ثاني
 يعني مو هذا وطنا؟!
 والبحر نفسه بحرنا؟!
 أستمع لك والمكان يفيض عزفه
 من خرير في هديل في حفيف
 ودي تتأمل دفيق الماي في رمل الشواطي
 وشوشات اسرار طفله
 في اذن طفل على شطه صديق
 ودي أفهم لحن هذا لو حديث؟!
 أنتبه وإلا احتوي واملا جيوبي
 بالنجوم اللي امطرت حولك وحولي؟
 أنتبه لك ويتنازعني حنيني للجنون
 مادري أجري والاّ أمشي
 أروي اقدامي من امواج البحر
 والا اغربل في سواحلنا
 وأعمر لك من اصدافه فنون؟
 واترك احساسي يحلق في صدى صوتك
 واقول:
 آنه تكفيني معاك هناك صخره
 لاتبالي بالنجوم
 إهي تتبعني وتدري اني ما خذني حديثك
 واني اسمعك والله اسمعك
 بس ما دري وش تقول
 كنت أفكر وانت داله في حديثك
 واني اسمعك والله اسمعك
 بس مادري وش تقول
 كنت أفكر وانت داله في حديثك
 يا ترى كل الليالي اللي قبلنا مثل هذا الليل
 واحنا؟
 وإلا حس الليل فينا ولون طيور الجزيره؟
 غردت وإلا أنت تحكي؟!
 هذا صوتك ولا لعب الموج يمي؟!
 البحر والليل وانته
 مغيبه كنت آنا عندك
 اللي أعرفه انك تقول اكثر وتحكي
 وان ايدك لامست مرات كفي
 وان مسباحك من الياقوت
 كان ينتقل من كفوفك لي كفي
 وانتبهت إلا يدي بيمناك والمسباح واحد
 انت رايح في حديثك
 وآنه اسبح واحمده راعي الثلاثه
 البحر والليل واحنا
 كنت اسمعك كان يكفيني سماعك
 بس ما دري وش تقول...

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين