بمناسبة زيارة الامير فيصل بن مساعد بن سعود لبقعاء - نايف العبيد

بسم ربي خالق الكون الفسيح
ابتدي قصيدتي يا أهل الحفل

شاعرٍ معروف ولساني فصيح
انثر الإبداع والشعر الجزل

عند أبو عبيد أنثر أشعاري وابيح
دعوةٍ جتني وعنها ما إزل

وبعدها يامرحبا مافاح شيح
باللي نوّر ديرتي يومه وصل

ياهلا بفيصل أبو وجه ٍ فليح
حايل وبقعاء بشوفه تحتفل

الفخر يزهاه وأبيات المديح
فيه تحتار القوافي والجمل

جِدّه معزي أبد ماله نطيح
الملك عبدالعزيز اللي رحل

وحّد الدولة على الهدي الصحيح
وأزهرت من عقب ماكانت محل

كم خصيمٍ من سطر سيفه طريح
وكم يتيمٍ من سخاء كفه كفل

جعله بقبره سعيد ومستريح
ياجره ربي على خير العمل

وابو متعب جعل يفداه الشحيح
مملكتنا تحت ظله تحتفل

هو ذرانا عن هبايب كل ريح
خادم البيتين تخضع له دول

ونايف برايه وفي شوره رجيح
يمنى عبدالله ولي عهد وأمل

في قراراته و وقفاته صريح
العدو يجفاه نومه لا زعل

ياعسى ربي عن الدولة يزيح
المصايب والبلاوي والجهل

واسمحوا لي دامي اوجزت القريح
خير قول المرء ماقل ودل

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر