قصيده ترحيبيه في مقدم صاحب السمو الملكي الأمير / مشعل
بن سعود بن عبد العزيز ال سعود . أثناء زيارته لمحافظة يدمه بعد
تعيينه أميرا لمنطقة نجران . وقد ألقيت أمام سموه بتاريخ
2/4/1418ه
باسماك ياذا الكون ياللي كل عبد يزهمه
انت القريب انت المجيب اللي عليك الاعتماد
ياحي ياقيوم ياعالم بما لم نعلمه
ياعالم الجهرى وما يخفى ورزاق العباد
وعداد ماتمطر مقاديم المزون المرزمه
البرق فيها والرعد وخيالها همل وجاد
بسم المحافظ والاهالي في محافظة يدمه
يامرحبا ترحيب وافي من شذا عنبر وكاد
قلناه في مقدم الامير اللي عزيز مقدمه
الزاير اللي للجميع زيارته غاية مراد
ونكرر الترحيب لضيوف بصحبه قادمه
واليوم والليله يابوة نواف من ظمن العياد
ياسيدي مشعل نهنيكم بهذا المكرمه
ثقه ملكيه سموك قدها علم ٍ وكاد
ولايوثق الا فالرجال اللي تحل المبهمه
فيها الاصاله والعداله والشكاله والسداد
ياعنك ماضاعت ظنون اللي بك الظن ارسمه
الظن فيك محقق ٍ ماهوب هجس ولاعتقاد
مجدك يابو نواف كلاً من قديم يفهمه
مشعل وابوك سعود بن عبد العزيز ولك يعاد
والمدح فيمن يستحقه حق محد ٍ يكتمه
ومن يستحق المدح غير اهل القديمات الجداد
والعهد والمجد المخلد مبتداه ومختمه
أنتم هله يانصرة الاسلام حكام البلاد
من فجر أخو نوره تزعم حكم نجد ٍ وحكمه
مامعه غير الاربعين اللي بالاسماء والعداد
صبح صباح مغامر ٍ مغوار والقصر ادهمه
الموت مره ماخطر له في دماغ ولا فواد
الصبحه اللي بعدها رفرف شعاره وعلمه
ونادى بصوت للسلام وصوت ثاني للجهاد
وواصل صباح وليل والمقصود أقره وحسمه
وسيطر على الموقف وشب النار في خشم الزناد
وبالجيش والخيل الاصايل والرجال المقحمه
بالرمح والبارود والمجهود وسيوف الهناد
ياردد بحيظان المنايا والورود مزاحمه
ويذودهم عنها وهم في كثر عمدان الجراد
جمعا ً يسالم له وجمع ٍ مايسالم يهزمه
حتى حكم شبه الجزيره واعتلى فوق الشداد
من بعد ماكنت على هذا وذاك مقسمه
سيطر على مترامية الاطراف ذات الامتداد
من البحر الاحمر الى بحر الخليج مرسمه
ومن الشمال إلى الجنوب الامن والايمان ساد
هذا عهد عبد العزيز وبعد هذا سلمه
وانقاد عهد العز في من طور النهضه واشاد
سعود. بحر الجود. يوم ايام. هده والزمه
رجل الفداء سقم العداء فرز الوغاء صقر الهداد
من عاد بين الناس وظروف الحياة مهاجمه
يمًن مخافتها ويكرمها ويلهمها الرشاد
ذخر المواطن والوطن ويحوش الاقصين اكرمه
وغيث ٍ على الضيفان والجيران ويحل القياد
وبعده حكم فيصل وخالد والعهود منظمه
من عهد خطلان الاياد لعهد خطلان الاياد
أهل العداله والتظامن واهل الارياء المحكمه
مخلدين المجد فوق المجد جدٍ واجتهاد
واليوم في عهد الفهد ومحصنه ومكرمه
درع لها ظلٍ لها في قيض ولا في براد
يستدرك الصعبات بسياسه وخطه مبرمه
وهو الشجاع وهو كعام اللي يدور للعناد
حكامنا منا وفينا والعهود مقدمه
بكفوف بيضاء والكفوف البيض ماتقبل سواد
دستورها القرءان والدين الحنيف القيمه
واحكامها شريعةٍ والرايه والراية الخظراء سناد
الله يبقي حيهم والراحل الله يرحمه
أمين يارب العباد وباسط السبع المهاد
واعيد معنا القاف في مشعل واعده وانظمه
والمدح في مشعل حقيقه مايعارضها أنتقاد
طيار مغوار ٍ ليا جات الظروف اللازمه
أمير لك هيبه وشبرً كل ماعوده زاد
الحظ طيب وانت تعيينك صعدبه ودعمه
وهذا أمنيتنا سيدي ولا سواها مايراد
الله ايديمك فالوجود ومثلكم مانعدمه
ياطيب المبداءؤ ويادرع ٍ حصينٍ مايحاد
هذا وحنا نلتمس منك العلوم الغانمه
للمنطقه هذي مطالب وانت غيرك مايفاد
ومن غيركم ياسيدي يفطن لها ونكلمه
أشارة والصقر تكفيه الاشاره ماتعاد
حنا احزام لك ومن كنا يامشعل محزمه
يرقا سنود أن جات ساعات العزاوي والطراد
وحنا عجب عينك ليا جاء فالحدود مكازمه
ليجات ساعات الله الله واحتما ضرب الركاد
خدمة ملك خدمة وطن والدين جمعٍ ً نخدمه
ومادام نار العز حيه نجعل الاعداء رماد
قلته ونا من لابة بعهودها متقدمه
عهودهم مصيونة ٍ معكم ولا فيها ارتداد
قبايل ال فطيح ووعيل الهشامي نزهمه
من صلب يام ليا دعيتوا للصباح وللهجاد
واسلم ودم ياسيدي والقاف بيته نختمه
صلوا على طاها رسول الحق واخير العباد

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر