صرخة الطاغي

ياصاح والهاجوس متفرعن على بحر القصيد
ويقول لأمواج البحور الزرق لله درها

اطب في وسط البحر والله يفعل مايريد
والديره اللي ماتسلي خاطري مامرها

عندي هجوسٍ مايجن الا على البيت الفريد
ويقول لجزال البيوت الله يكافي شرها

حاظر معك والراس يبغا يطق بالراس العنيد
وحر الكبود الفايحه ربي يبرّد حرها

النار تاكل فالحطب وتقولك هل من مزيد
ياللي تعرف النار وش هو نفعها من ضرها

دامك تبيها فالقريب انحطها والا البعيد
.والا تبيها وسط قلبك والعيون تصرها

. اللي تبي سوه وماقدمك سوا الباس الشديد
 يردها ف نحور قوماسلاحها ماسرها

 الغيث لاهل المطر طفاك يانار البليد
لو ان راعي النار ليله كلّبوه ايكرها

 لو الذياب تخاف من كثر التهدد والوعيد
ماكان شفت الذيب يعوي والذبيحه جرها

انته تبي كبد الجمل لكن مادري وش تصيد
الله ياكثر الهقاوي والبنادم غرها

حنا بشر والله مميّزنا نفيد ونستفيد
والله مكرمنا عن اللي ذيلها مافرها

تبي تخيّرني وانا شلفاي في نحر العقيد
 مير الجرب بجلود بعض الخلق قام ايعرها

اختار في ميتة قهر واختار في ميتة شهيد
الثانيه ياحلوها والاوله يامرها

لو الشجاعه صرخة الطاغي على الرجل الزهيد
اشهد شهادة حق ماجحدها بعد ماقرها

اخترت راس الطيّب اللي لايهسّ ولايحيد
وانته تريّح واجمع احلامك شوي وثرها

لو الرّجال الطيّبه تقول لكن ماتعيد
 كان الرماده في عيون اهل الحكي ما أذرها