سلف !

تعبت ادور سلف في جيب امانينا
بس الاماني تعيي لا تسلفني

وتعبت اخبي لنا الحلم وأدارينا
ونظرات عين البشر كنها تقطفني

من يوم غبتي وماتت كل غناوينا !
وانا الحزن فيّ يدفى ويتلحفني

ادق باب الامل عله يحاكينا
بس الامل يهمل الطرق ويصرفني !

واروح لاخر مكان به خطاوينا ...
ماتت ,, واطيل النظر فيها واسولفني

واحاول استرجع الماضي وانادينا !
وتجاوب دموع عين اردها ب جفني

واتبسم اليا ذكرت اخر حكاوينا
وحتى ابتساماتي الصفرا تأففني

واقوم واجمع شتاتي ي مجافينا
ومن بحر ذكراك أخذني وأغرفني

واوجه الوجه يم البعد والمينا
وفي اخر الدرب ماضينا يوقفني

معدوم حيلي ومهدور الشرايينا !
مدري من اي البشر والخلق أصنفني

الله واكبر على حزن(ن) مأذينا
دايم على درب سفك الدمع يجرفني

احيان اقول القدر ووش بيادينا ؟!
واحيان اقول الهوى فحبك مكتفني

مدري البلا ف الزمن ولا البلا فينا !
لكن درب الفرح دايم مخالفني

تعال وانثر عبيرك ي معنينا !
وعطر ضلوع التعب وصلك وانصفني

تعال واسقي خفوقي ماك واحيينا !
وخل عين الاحزان في جيتك تذرفني

تعال وانسى في قربي كل ماضينا !
تكفى دخيلك من الاحزان اخطفني

((*انت البدايات واخر ساحل ومينا ))
وانا في بعدك ترى ماعاد أعرفني