واصاحبي اللي جاني يطلب سلف دين !

لـ فيصل الجابري، ، في الحكمه والنصح، آخر تحديث

واصاحبي اللي جاني يطلب سلف دين ! - فيصل الجابري

واصاحبي اللي جاني يطلب سلف دين
مبلغ كبير بجانبه أربعه أصفار

كان السبب يبغى يزوّج عروسين
وأعطى وعود يجيبها بدون انكار

وكنت أحسبنّي للأسف أعرفه زين
كنت أحسبنّه من طويلين الأشبار

ما قلت غير ابشر ولا قلت بعدين
كتبت شيكه واعتبرته من أسرار

هذا الكلام اليوم عدّى له اسنين
ما قلت له وينه ولا قلت وش صار

الأمر عادي قلت يمكن مسيكين
يمكن ظروفه أو يجوز إنها أقدار

بس اللي ذوّقني الحقيقة الأمرّين
كونه حجز لأهله وناوي على أسفار

فكّرت أقلّه إنته رايح على وين
يا صاحب استح خل دمّك شوي حار

سدّد ديونك كان جمّعت قرشين
الدين أولى من السفر عند الأحرار

لو هو ضرورة لأجل أهْلك مريضين
أقول يمكن ألتمسلك بالأعذار

لكن تسافر ترضي حرمة وبزارين
عز الله عار ولا يجي مثلها عار

وأنا اسمحولي قلتها لأجل أمرين
للعبرة أول ولجل أفضفض بالأشعار

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر