شقير بن عقيل الجذع
واصاحبي دونه من الشط غبّه

غبّات وأمواج ٍ تكيد السفينه
دونه محيطٍ كوّنه حكم ربه

ما حدّدو طول المدى غايصينه
كم قاربٍ هاز العبور وقلبه

وكم ضاع به من صافيات المكينه
في نجد وأنا في ديار المسبه

دارٍ عجزت أعرف لهلها رطينه
دارٍ عسى صم القنابل تدبه

تحرق علو أرضه وتظهر دفينه
دار الهنود اللي مباه ولاحبه

حيث الشريف اللي يجيها تهينه
فيها يعيش اللي نسي خوف ربه

خطو البهيم اللي تهاون بدينه
نذل ٍ لقى الحوض الحرام وشربه

قطع اليدين ولا حياة الغبينه
يمشي على راسه من العيب قبه

تبّاع عبّاد البقر في عرينه
متى براي الله نروح ونكبه

وأشوف من عيني تبي شوف عينه
لو هو بعيد الدار قلبي يحبه

وروحي عليه من المحبه حزينه
خشفٍ سلب قلبي غلاه ولعبه

لعبة سلوك الوتر مع لاعبينه
زند الغلا فيّه قدحبه وشبه

وطحن ودقق بالمحبه طحينه
بعده مرض قلبي ولاماه طبه

وعليه قلبي باح خافي كنينه
وجدي عليهم وجد من ماه صبه

على بذور ٍ مشتراها بدينه
في خانة المليون سمه وحبه

غير النقود وما تحوشه يدينه
وبعد استتم الزرع وهوه تعبه

خيّل عليه اللي حقاقٍ غشينه
وأخذ عليه السيل ربعه وغبه

لين اختلط حبه وتبنه وطينه
وعوّد وحظّه فالمجالس يسبه

يطق كف بكف لمعذلينه
على الذي حي ٍ وميت بحبه

الوصف كامل والمذاهب حصينه
لا عاري ٍ عوده ولاهوب دبه

معزلٍ تزها البناجر يدينه
مناحرة صدر ومحاجر ولبه

وليا عرض خصر ٍ يهلّك جنينه
خشفٍ عذا نجد العذيه مربه

غربٍ من الدمام شرق المدينه
في قريةٍ مابين وادي وتَبَّه

أربع حروف الاسم يا عارفينه
للي قرا بأي الكتاب وكتبه

اسمه بحرف من اسم هاك المدينه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر