عسى السحاب اللي تراكم خـياله - جهز بن مسيمير المرشدي

عسى السحاب اللي تراكم خياله
جاله رعد وبروق في تالي الليل

مزن ٍ من المنشا يهيض اشتعاله
فا لليل من برقه تبين الاقاذيل

في حكمة المعبود جلا جلاله
يامر به الرحمن منش المخاييل

جعله من الساحل وعالي جباله
ومن شرق شرقي الحفر يذ كر السيل

سيل ٍ يعم من الجنوب وشماله
يعم كل المملكه با التفاصيل

وياخذ شهر في نجد يسقي عباله
من كشب ياصل سيله اقصا المكاحيل

وياصل ليا ساجر ويسقي سهاله
هاك البطين اللي بحيد الغراميل

يعل دار أ هل الوفا و الشكاله
أهل الشجاعه والكرم والتنا فيل

ربعي عتيبه كاسبين الجماله
عاداتهم فا الضيق شرب الفناجيل

عسى وطنهم يكتسي من جماله
ويظفي عليه من الخزامى تشاكيل

يطلع ربيع ٍ كل ما جا مجاله
تضربه الا مثال جيل ٍ بعد جيل

اللي يشوفه ينشرح ضيق باله
شوف الربيع دواء القلوب الماغاليل

ليا من عشب البر زان اكتماله
وضفا على كل السهل والمصاقيل

كل ٍ يربع في محله الحاله
البدو ما يطرون للحط والشيل

راع الحلال يشوف لذت حلاله
يرتاح باله ما يطر المحاويل

ماعاد يعطي للمقاول رياله
يفتك من شري العلف والبهاذيل

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر