انتشر حبك بجسمي .. لا وحتى بالعظام
واختلط حبك بدمي .. فالمعاليق يعدي
يا هيام ٍ في هيام ٍ في هيام ٍ في هيام
يا ضياعي ! يا اتجاهي ! يا دروب المهتدي
لو تذوق النوم .. جفني ما تهنّى بالمنام
طاوله فيك الغرام .. وطاوله فيك سهدي
لك حبيبي في ثنايا جوف هالقلب احترام
لك حبيبي قولتي : لبيه .. آمر .. يا بعدي
كيف اصبحك بسلام ! وكيف امسيك بسلام !
وانت في مجرى وريدي مع سواقيه تغدي
لك عيوني .. لك حياتي .. لك سنيني .. لك مقام
لك حلالي .. لك فوادي .. لك ورودي وشهدي
فوق كفك دق حنّا .. والبلا فعل الزمام
والحلا .. ليل ٍ تسلل فوق الامتان اجعدي
لا طويل .. ولا قصير .. ويا حلو زين القوام
جلّ من صوّرك والله في غرامك مولدي
ما لقينا لك شبيه ٍ في غنادير الشوام
وما لقينا لك شبيه ٍ في بنات الاحمدي
انت دانه .. وانت آيه .. وانت عشق المستهام
وانت نادر في عيوني يا عيوني وسعدي
وانت والله يا ( صغير الحب ) من قبل الفطام
ما قصرت الفكر دونك .. لا ولا ضاع جهدي
انت امسي .. وانت انسي .. وانت جرحي والختام
وانت والله يا حبيبي شمعة اليوم لغدي
انت غاية مطلبي يا روح روحي والغرام
وانت شف البال والله وانت غاية مقصدي
احسد البرقع عليك .. ولا حسدت إلاّ لثام
! كيف ما يخجل ! وليله ما غدى عنه اجودي!
فوق خدك .. حب خالك ! وازعلوا منه العمام
! كيف يقدر يستبيح الخد يا خد ٍ ندي!
ترتدي ثوب الشرف و العز من فوقه وسام
كيف ما يصبح وسامك ! وانت عزّه مرتدي
بنت شيخ ٍ ما توانى .. ما يفك إلاّ الزحام
فزعة اللي ينتخي ويصيح تكفى يا سندي
و الحظيظ اللي قرب حظه من حظوظ الكرام
ما خشى شر الزمان .. ولا خشى الحظ الردي!
اترك الواقع واعيشك في خيالي بنسجام
واربط الواقع بأحلام الخيال السرمدي
ما بغيتك فالظلام .. ولا بغيتك بالحرام
! ما بغيتك غير بالعز الشريف المقتدي
ما بغيتك بالتلاعب .. ما بغيتك بالكلام
ما بغيت إلاّ اخوك يصير خال ٍ لولدي
لك جنوني .. لك ظنوني .. يا حبيبي والسلام
وانت غالي .. ثم غالي .. ثم غالي .. يا سعدي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين