واعيني اللي شافت اشيا مقيته
زادت جروح الوقت لوعات والام
شي ٍ يحز بخاطري ما كنيته
سعر العرب عند العجم سعر الانعام
كل ٍ نهار العيد ذكّى ضحيته
والغرب ضحوا يا ملا براس صدام
ميته ولاهي يا عرب بأي ميته
اكبر مذله للعروبه والاسلام
القايد اللي ذاع فالناس صيته
اوعز على ردع المعادين الاحكام
صحيح ظالم لكن اللي رايته
شي ٍ يذل ويجعل الحر ينضام
من اقصى المحيط الاطلسي لين كيته
ومن سد مأرب لين تاصل الى الشام
عراق .. جلباب الكرامه رميته
!! والا على صدرك دناميت والغام
عاش البطل فيك وفداك وفديته
ولا ارخص ثراك بحق مخصوص او عام
وقلوب شعبك باللقا مستميته
خلت عدوك باللقا كومة ركام
سنتك تبكي قايدك وان بكيته
ما تنفع الدمعه على حكم الاعدام
ليته وليته ليت ليته وليته
لكنّ ما يجدي بها لوم لوّام
ماهمني لو قالو انك رثيته
ليت العرب فيهم ثمانين صدام
استجمعك قوه وحزنك محيته
وارجي لك الوحده بعد جور الايام
يا خوف عيني من قرار ٍ لقيته
فيه الخطط ترقص على حبر الاقلام
علم ٍ مؤكد لكن انّي نفيته
تقرير سري ما ظهر عند الاعلام
من تحت مجهر عاكساتي قريته
كنّه يقول العلم قدام قدام
اذكرْه دايم لا حشى ما نسيته
تقرير سري صادر بعشرة اختام
حديث متواتر وعنهم رويته
حنّا بعين الغرب ( مجموعة اقزام )
اخلاصة الموضوع واللي بغيته
شي ٍ ضروري واجزم انه لكم هام
كل ٍ يجوّد يا عرب سور بيته
من قبل لا يصبح للاغراب خدّام

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين