السوق روّح يا ملا في خبر كان
شي ٍحصل ماشفت له أي تفسير
النفط غالي والوطن امن وامان
والاقتصاد العالمي وضعه بخير
لكن مدري وش حصل فيه من شان
ينزل نزول ٍ ماله ايّات تبرير
صحيح مابه نار من غير دخان
وصحيح شي ٍ يجعل العاقل يحير
سوق الاشاعه بالاشاعات مزدان
ولا ما يفيد اللوم والا المحاذير
يطلع وينزل ما يحدده ميزان
لعبه على كيف الطغاة الهوامير
فيه الهوامير الكبيره لها شان
ما قصرت فينا ولا فيه تقصير
واللي تبيه: الشعب حافي وفقران
تمشي على منهج سياسات تفقير
سياسة المنهج لديهم بعنوان
شدالسهم تاكل فطيرتك وتطير
ولا لا يهمك شعب جاهل وهلكان
خل الخشاش تعيش منه العصافير
وكل ٍ يحلل صار بالسوق فهمان
وحنا على الشاشات نمسك طوابير
قول المحلل بث فيني طمئنان
وحطيت مالي بين مكه وتعمير
وطاحن سوا واللي طلع بس جيزان
اسمع كلام ممتر السوق تمتير
اول يفيض المال والبنك مليان
ولا شلت هم ضيوف والا مسايير
صيفتي ما بين بيروت ..عمّان
والدفع بالليرات والا دناينر
طاغي ومعي فلوس فاضي وفسقان
ولاهمني فالدرب كثر المشاوير
واليوم وضعي سي مفلس وطفران
وادوّر الميه مع صوير وعوير
ولا عاد اداني شوف طرقي وديّان
وان شفتهم صدفه عيوني مطايير
عزيمتي شرهه ولاهيب صفطان
واليا تعذر قلت دربك مسافير
انا اشهد انه سوق دجه وخسران
تكفون يا روس الرجال المناعير
وايت بجنب الفين راس ٍ من الضان
والا بكارٍ منتقيها مغاتير
والا عماره بين شقه ودكان
اخير من سوق ٍ تلته المخاسير

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين