قال الذي يقرا.. بليا مكاتيب

قال الذي يقرا.. بليا مكاتيب
ياللي تقرون العمى من عناكم

يا عيال ياللي.. تشرفون المراقيب
تريضوا لي.. واقصروا.. من خطاكم

خوذوا كلام الصدق.. ما به تكاذيب
مثل السند.. مضمون للي وراكم

يا عيال.. لا صرتوا.. ضيوف ومعازيب
ترى الكلام الزين.. ملحة قراكم

وترى السبابة.. من كبار العذاريب
وهرج البلايس.. ما يطول لحاكم

المذهب الطيب ..رى.. مذهب الطيب
والمذهب الخايب.. يبور نساكم

يا عيال.. ما سرحتكم.. باللواهيب
يا عيال.. ما عمر المعزب.. ولاكم

يا عيال.. مضربتكم.. بالمشاعيب
ولا سمعوا الجيران.. لجة بكاكم

من حبكم.. أرطب القلب.. ترطيب
يفز قلبي . يوم يبكي حداكم

ياما تسلوعت القبايل.. تقل ذيب
من خوف.. لا يقصر عليكم.. عشاكم

أحميت رجليني.. بحامي اللواهيب
وخليت لحم الريم.. يخلط عشاكم

وياما قطعت من الفيافي العباعيب
أجيب من صيد البراري.. غذاكم

واليوم.. هذي لحيتي.. كلها شيب
هذا زمان قعودنا.. في ذراكم

يا عيال.. بعتوني.. بصفر العراقيب
ما هي حقوقي.. سود الله قراكم

قمت أتواكا.. فوق عوج المصاليب
قصرت خطانا.. يوم طالت خطاكم

يا عيال.. من حقي عليكم.. مطاليب
ردوا لي القرضة.. جزا ... جزاكم

ماني بفاضحكم.. بوسط الأجانيب
بأعمالكم.. يدرون كل أقرباكم

لو كان تدرون الردى.. والمعاييب
صرتوا مع المخلوق.. مثل أخوياكم

المنسب الطيب.. ترى المنسب الطيب
المنسب الطيب يزكي خفاكم

خوالكم . بالطيب.. تروىي المغاليب
ولو تتبعون الجد.. محد شناكم

وش علمكم.. ياتاركين المواجيب
حسبي عليكم.. هالردى.. وين جاكم؟

يا الله عسى أعماركم.. شمسها.. اتغيب
ويعتم قمركم.. ثتظلم سماكم

يا علكم.. في حاميات اللواهيب
ياللي على الود.. كثير لغاكم

نصحتكم.. واسندت وادي سلاحيب
لقيت بالصبخا.. مدافيق ماكم

الناس تدري.. بالردى والمعاييب
لا قبل حديكم.. قيل.. جاكم بلاكم

شفت الجفا والحيف والغلب والريب
بطلوعكم ... لا بيض الله.. قراكم

اخسو.. خسيتوا.. يا كبار اللغابيب
أهبوا.. هبيتوا.. يقطع الله نماكم

عسى نساكم.. ما تحمل.. ولا تجيب
ولحد من البزران.. يمشي وراكم

صيور ما هو.. عاوي بيننا.. الذيب
بالقبر . ما افرق طيبكم.. من رداكم