هوى حايل - ثامر الشلاقي

ان طال و ان ماطال عمري و اذا طال
مالي هوى مسكان في غير حايل

فكرة جفاهم مود ما جت على البال
اذا قصر عمري واذا كان طايل

مالي عنه صده و مده و مرحال
ثنيت عن غيره يدي الرحايل

لو الجبل يوزن بثقله من المال
ما رحت عنها ولا رضيت البدايل

بالحيل احبك حيل يا ذيك الاطلال
جعله تعلك مرزمات المخايل

من مدلهم روح العصر همال
برقه يعقرب بالسماء له شعايل

يم الشعيب اللى له سنين ما سال
يمشي وتمشي منه كل المسايل

يا دار انا أحبك مثل قول من قال
من حب عين تحب دار وقبايل

يغلا بلد كامل على شان رجال
و عندي دليل دامغ للدلايل

من حب ملهوف الحشى زين الاقبال
حبيت لي ناس تتيه القوايل

لو الخطا منهم بحقي كما الجال
يدمح خطاهم حب ضاف الجدايل

المترف اللى للمعاليق نتال
حبه ينسيني خطا كل عايل

بالحيل احبه حيل والحب قتال
اليوم وامس وبالسنين الاوايل

حب نما بقلوبنا بسن الاطفال
ما زعزعه عن موقعه قول قايل

و ان قلت له طال الصبر قال ماطال
ودلاء يماته بي قليل الجمايل

و ان جيت ابشرح له على بعض الاحوال
قالت تسد عن الكثير القلايل

و من الحيا وجهه غدى سبعة اشكال
و اقفى و اشار برمز قل الوسايل

و عرفت مالي في مواصله مدخال
من يوم بانت لي رموز الرسايل

لا لي معه حيله وليا جيت ابي احتال
يا بعد حايل عن روابي محايل

© 2024 - موقع الشعر