اظلم عشيقه - تركي السواط

ادري رحلتي عن مواني حياتي
وادري تركتي داخلي ألف ضيقه

وادري رحلتي يوم شفتي شتاتي
وحالك يقول لكل واحد طريقه

يا ظالمتني وش تسوي بذاتي
ليه بيدينك تشعلين الحريقه

وليش الجزا خالف جميع امنياتي
وظلمك قطع آخر خيوط الحقيقه

نسيتي اللي قال لك ياهناتي
اللي معك غاص البحور العميقه

ونسيتي اللي قال انتي غناتي
واشوفك الماس الغرام وبريقه

خلاص ماحنيتي لذكرياتي
وما عاد باقي لي بقلبك وثيقه

يعني لعنتي جد احلى صفاتي
واسمي بعد ما عادت اذنك تطيقه

طيب على امرك كل مافات ماتي
بهيم بارض الله ونفسي طليقه

وبطعن خفوقي لو تجي في مباتي
ماودي اشوفك بحلمي دقيقه

مدام معك العمر روح فواتي
جرح(ن) غفى ما ودي أحد(ن) يفيقه

عساني القا الفرح فالمقبلاتي
واعيش عمري مثل باقي الخليقه

والا بيوم(ن) تسمعي عن وفاتي
وتحسي انك كنتي اظلم عشيقه

© 2024 - موقع الشعر