صاحت كتابات الظلام وملت أوراق الهجر
وانكسرت اقلام الجفا والمحبره والوانها
وسهر خفوق(ن) مايحبك يالسهر لين الفجر
وشرب قطاعة خمسه اشهر وانكسر فنجانها
وتاهت خطاويه وانا اللي ممشي الدرب العجر
وجفت اراضي شوقي وبكيت على وديانها
ياصاحبي طولت بغيابك وانا ادري مايجر
غيابك الا كسرت اشواقي ودمع اعيانها
رحت وتركت اللي بعد فرقاك حاويه الضجر
واحرمتني حتى رسايل عشقك وعنوانها
وفتحت في خلك ميادين العواذل والغجر
لين اركضت خيل الشماته وانتشوا فرسانها
ماكنت احس انك تعاملني وقلبك من حجر
ولاكنت اعرف ان القطيعه فاتحه بيبانها
حتى اكتشفت ان الخفايا بعد والظاهر نجر
وشربتني قهوة نواياك وبهار احزانها
كذا كذا حطمتني الله ياكبر الفجر
ويامكبر الزله علي وياصعب نسيانها
وياشينها لمن تذكرتك ودمعي انفجر
وانت اللذي كنت بحياتي شجرتي واغصانها
لكن طار اللي يحبك والظما موت الشجر
والليل موحش والمحبه غشني ميزانها
انسا ملامح صاحبك واحجر على الذكرى حجر
ماعاد روحي تعشقك مدام طبعك خانها

حقوق النشر محفوظة لـشاعر

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2004 - 2019 - موقع الشعر