رسالةٍ جتني على الفكس ملي
من شاعرٍ يشكي من اللي جراله
معناه ذكرني علومٍ مضاًلي
وشعره يذكرني قصايد فضاله
اللي جرالك يافهد جاريلي
ألاّ اني أقدم منك في كل حاله
اللي فصل لك من قماشه فصل لي
لولا أختلاف اللون والكمبياله
واللي يعل القلب بالحيل علي
ليا صار من عاقل تجيك الجهاله
أبعد بعيدٍ عنك صار متعلي
وأقرب قريبٍ منك وقف بجاله
ومن بعدها همٍ عليه متولي
نوم الهنا في مضجعه ما صفاله
تقول مكسورٍ على الدرب خلي
خلوه ربعه بالمعاره لحاله
يشرب من أكواب العذاب ويعلي
وشاف المذله عقب شوف الشكاله
يشكي الهموم اللي لحاله تسلي
تومي به أوماي الرشا بالمحاله
هموم رحاله والاخرى تحلي
تزوره أكثر من زيارة خواله
وقامت تتله بين الاثنين تلي
بين الوداع وبين حق النزاله
كيف الهموم لخافقه تستحلي
ودفاعه أقوى من رواسي جباله
ولاتعصي الوالد ولو كان زلي
تحمله مهما يكون أحتماله
عسى همومك يافهد تضمحلي
ولعل غيم الهم عجلٍ زواله
مطلوب كومندز وقايد مظلي
القصد من سجن الهموم انتشاله
والشرع يفرق بين حرمٍ وحلي
والصلح خير وحكمنا بالعداله
ويجري أمورٍ مثلها يوم احلي
وبالصبر يفرجها عزيز الجلاله
ويمناً تجيب حقوقها ما تشلي
وترى الحدث ما طبه الا الإزاله
واللي نهار الزحف يرضى التولي
عساه من زمرة جهنم نكاله
وعذروبي اللي تذكره جايزٍلي
كنز القناعه ما تزيده حواله
ممشاي في جوٍ خلا مكسبٍ لي
والبعد عن دار الصخب والظلاله
ملزوم عن سوق الرخيص أستقلي
الربح جاء دونه كساد وبطاله
وتبقى كما نجمٍ على الكون طلي
والمرجله ما نلتها بالوكاله
وشتان ما بين الغلا والتغلي
وتم الكلام اللي كمل باكتماله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين