حبيب العام - ياسر حسن الجنيد

حبيب العام ..
وش ناوي بعد ما ضاعت الأحلام ؟
وش ناوي بعد ما التم ..
شمل فراقنا بالهم ؟
لا تهتم ..
وفّي دورة الأيام ..
وطفّي جمرة الأوهام ..
ودفّي خاطرك لا نام ..
.
حبيب العام .. وش ناوي ؟
 
****
 
حبيب العام ..
إذا ناوي تعيش بهالزمن راضي
ضروري تهجر الذكرى ..
ولا تستعطف الماضي ..
ولا تحزن بعد فرقاي ..
تناسى / خابرك نسّاي
وشوف لجرحك مداوي ..
وإروي عمرك الذاوي
.
حبيب العام .. وش ناوي ؟
 
****
 
حبيبي لا تغامر في شبابك
ولا تقفل على حسنك وباقي العمر بابك
أخاف اليأس ينتابك ..
وتتشابك ظنونك مع صوابك
أمانة لا تلاحقني ..
ولا يلهث حنينك خلف أخباري
أنا ما ودّي تنطقني ..
حروف الشوق أو تستوطن أشعاري
ولا ودّي يرافقني ..
مع جروحي ندم يحتلّني ويشتت أفكاري
ولا تبكي على فرقاي ..
تناسى / خابرك نسّاي
وشوف لجرحك مداوي ..
وإروي عمرك الذاوي
.
حبيب العام .. وش ناوي ؟
 
****
 
حظوظك جَمّ ..
وكلك بالأدب مفعم .. ثير إعجاب
فلا تسأم وتتجهم .. إذا جاك الهوى طلاّب
وجامل ثورة الذكرى .. وقابل بالرضا بكرى
ولا تغتم .. إذا جوّ الهوى غيّم
تحامل بس لا تكتم .. وغازل غيمته بعتاب
.
.
.
حبيبي الأقرب الأبعد .. تعال اِبعِد ..
ترى موعدنا مستبعد
خلاص اللي مضى .. عمر انقضى ..
من كثر ما شالته أكتافه
خلاص اللي حصل .. حب ارتجل ..
ما بيننا وانشلّت أطرافه
خلاص انت وانا .. ما ضمنا ..
حضن الهوى من جور ما شافه
خلاص أرجوك تنساني ..
ولا تحزن ولا تعاني
ولا تبكي على فرقاي ..
تناسى / خابرك نسّاي
وشوف لجرحك مداوي ..
وإروي عمرك الذاوي
.
حبيب العام .. وش ناوي ؟
© 2024 - موقع الشعر