لو سمحت ..!

يا حبيبي استمع لي لو سمحت
دام ظلمك ساد افهم موقفي
 
قلت كل اللي بقلبك واسترحت
اتهمت وماتبي منّي نفي ؟ 
 
والله إنّي من قسى اللوم إنذبحت
لين بان الضيق في نبض أحْرفي
 
لا يغرك لو سكت وما شرحت
كنت حاشم لحية الجرح الخفي
 
لكن إعرف من فراقك ما فرحت
ونار حبك بالحشا ما تنطفي
 
في غرامك والله إنّي ما مزحت
جيت لك صادق من القلب الوفي
 
كم خطا لعيونك النجلا دمحت
دون عذرك في رجوعك  أكتفي
 
وكم معَ صوتك تخيّلت وسرحت
لا سمعته  كل همٍ  يختفي
 
قربك اسمى ما بغيت وما طمحت
وانت صحّيت الجفا يوم إيْغَفي
 
ما كسبت الحب لكنّي ربحت
القصيد اللي بمعناه أحتفي
 
راح تدري باكر إنّي ما جرحت
يا مقابيل الليالي أنصفي