متى - حمود ناصر عبدالله

متى ياحظي المنحوس
تغيب عن باقي ايامي

وتسمح للسعاده تبوس
جبين وخد احلامي

متى ياحظي لي تضحك
تراك اتعبتني بالحيل

متى عيوني ترى صبحك
وتنسى سهدها والليل

متى يا حظي تتبسم
ويرحل ليلك العابس

وبسعدي متى تهتم
وابلل مبسمي اليابس

لانه من سنين ما نس
عليه من الفرح نسمه

وصدري بالهنا ماحس
الين نسيتني البسمه

ياحظي كفاني هموم
ونزف جروح آهاتي

وسما آمال كله غيوم
تصب الهم في اوقاتي

متى الاقي دروب السعد
بكل خطوه تهلي بي

متى شفاه الأمل تشهد
بأنك عفت تعذيبي

وتسبح غيمة الأفراح
بسما امالي الجمه

وتهتن مزنها ويرتاح
باقي العمر من همه

ابي الأزهار بي تفرح
ابيها تشوفني وتفوح

ابي النسمه تجي تسبح
ويعانق شذاها الروح

© 2024 - موقع الشعر