أجمل نبأ

طاحت ضلوع صدري..والفؤاد انثنى
يقدح احساس شاعر..يوم فكره لِفاه

واشتعل من غرامي كل جسمي وانا
لا جمح بي خيالي أبلغ اقصى مداه

منك يا من هواها في وجودي بَنَى
من ضميري حضاره..من كَنيني(فَلاه)!

ومن عروقي شوارع..تبتدي من هنا*
لين تشتال سَيرِك..ثم تمشي معاه!

ومن عيوني مناظر..شَوفَها اقتنى
كل حلوٍ لمحته..لجل شوفِك فداه!

حتى جوفي تنهّد..بِك..وفيك اعتنى
يشهق بهمس حبِّك..ثم يزفِر صداه!

ياظِلال الموده..في هجير العَنَا
يا زُلال المحبه..من كدور القُساه

يا شروق الوصايف..في بزوغِك (سَنَا)
يسْفر بنور ثَغْرِك لين يبدي ضياه

دنيتِك يالحبيبه كنّها لي (جَنَا)
إكفلي في ربوعك..عمر طوّل شَقاه

وابشري من عهودي..الوفا والهنا
لجل صادق حنانك..ما بدوِّر سِواه

يا معالي سُمُوِّك..لك خفوقي رَنَا
فوق لا شاف زينِك..في مَخَايل سَماه

ودّه يكون برقِك..والمطر لو ثَنَا
يروي العمر فينا..لين يبدا جَنَاه

إيه احبك..وقلبي..عن سِواك اغتنى
كيف!!والناس موجز..وانتي احلى نَبَاه!!