أفراح عيدي - راكان العتيبي

موادع أجمل ايام السنه وبليلة احساسي
أعد الوقت لين النور يبلج من فضاءاته

شماغي،ثوبي،وعطري برفقة قلبي الماسي
تولّه يا متى يبرق بشوقه جنب راحاته

على رفي هدية عيد لاغلى ربعي وناسي
تقول ابغى أذوب بصدر خلك وقت دقاته

هذاك العقد يا حظه،نوى يستلحق انفاسي
ليا داعب ترايبها عرف مضمون لمعاته

يحس ان الحلا كله متى ما صار لباسي
على مياس شوفه نوّر دروبي وعتماته

أنا وانتي وقصتنا (إضاءة)بين أقواسي
تخلي كل عشق الكون يقرأ سر غيراته

أنا لو هزِّك الوجدان كنِّي حيدِك الراسي
رجيتِك وقفيني بين خاطرك ومعاناته

على كف القدر عمري مشى مع وقتي القاسي
وعلى سندس كفوفك صاحبك موعود جنّاته!

سقتني أعذب انهارك وذقت برشفة الكاسي
رباعية عدودك يا رُبا صدري ونفحاته

أمل دايم،وحزن يموت ويّا صبري و يأسي
وموعد عمر بنتظره،وهذا العيد في ذاته

يا أعذب من هوا الغربي ليا من ذعذع براسي
وقامت كل ذرات الهوى ترويك همساته

صباح العيد يا عيدي وذِكرى حظي الناسي
حلاو العيد من (....) تحلِّي كل لحظاته!.

© 2024 - موقع الشعر