مات الكلام

الدمع طاح وودّع القلب صبره
وأنا على غصن السهر عود مبري

تخنقني العبرات عبرة وعبره
وأسري مع طيوف الوهم قلب عبري

كل الكلام يموت والصدر قبره
والصمت يسرقني ولا أشعر ولا أدري

ويصير وجه الليل صورة لدبره
أخاف أفضفض للمساء إموت صبري

ويصحى بجوفي جرح ما فيه كبره
وأضمّ فيني حلم قلبي وعمري

وآخذ عظة من حال وقتي وعبره
ويتسلل بروحي أمل شبه عذري

يشبه مرور الخيط مع ثقب الإبره
يرسم نهاية يأس في وجه فجري

أرواح تتباكى على سنين غبره
وأنا التعب من فوق رأسي وحدري

الخاطر المكسور وشلون جبره
لا صار مكتوب المقادير مقري

لو حظي المنحوس ما قصر شبره
ما كان عن دار الفرح طال هجري

يا صوتي المخنوق للبوح نبره
تعزف مواويل الحزن جوف صدري

ويا ليلي الموحش عط القلب صبره
لا تأخذه وأنته بالأحوال تدري

سُحبَ الهموم أغدت على الروح زبره
والضيق بثّه بين الأضلاع حصري

لا تقول لي ما عاد فالحال دبره
أخاف يصبح حلمي النوم بدري

أخذت من دورات الأيام خبره
وإن طاح قدر الوقت ما طاح قدري

أستأذنك حتى القلم جف حبره
مات الحكي مخنوق والقبر صدري