ينوح القلب , - خالد بن سهيل العبيريد

ينوح القلب وضلوعي تراجف منه لامن ناح
الا مني ذكرت الي مضى والحزن خانقني

وجفى عيني منام الليل ودموع العنى فواح
واحث خطاي للفرحه ولين الحزن سابقني

جزى الله ذكريات ٍ باقيه من وقتنا الي راح
تقول انا صديقت عمرك الي فات صادقني

وانا منها وعليها دمعي الي فوق خدي ساح
ابرضيها وبرثي حظ عمري يوم فارقني

لعل النفس تدله في زماني والحشى يرتاح
ويصبح همي الي عن منام الليل عاتقني

حسبت ان السعد برقه على طول الزمن لواح
واثر برق الشقى بأول شبابي كان شاعقني

ورعى الله خوة الي طيبهم بين النشاما فاح
ويرحم من وقف سيره وعن سيري مفارقني

ويرعى الله هواجيس ٍ على بدع القصيد صحاح
احقق مابغيته لو خيالي عنه يسرقني

ورجيتك ياعظيم وياكريم ٍ بالعطى ماشاح
تكافيني زمان ٍ في صواديفه يصافقني

ليا من البخت عانق بي الفرحه رجع ثم طاح
يعود به الزمان الي على الحرمان سايقني

© 2024 - موقع الشعر