استميح العذر

أستميح العذر منّك يا منآي وشفّي
يا هوى قلبي و روحي يا أعز ضيوفي

والله اني ما نسيتك لو أكون مقفّي
كيف ابنسى من ملى حبّه جميع رفوفي

لو كتمت اللي بصدري ما قدرت أخفّي
الغلا و الشوق كلّه ينقرا بحروفي

يا حبيبي راجع الماضي وفتش رفّي
شرط ماتلقى سوى طاريك وسط ظروفي

يا حبيبي يوم كفّك مشتبك في كفّي
اشعر اني مالك الدنيا بحد سيوفي

يا حبيبي جيت من صدق الشعور مطفّي
ما حسبت حساب رمحك يرتكز في جوفي

يا حبيبي والله اني في هواك موفّي
ما هجرتك مير قلبك عاجز إنّه يوفي

يا حبيبي والوصل ضوّه ماعاد يدفّي
عقب هاك الموقف اللي ما يفارق شوفي

كنت اظنّك أول اللي يوقفون بصفّي
انصدمت انّك تحط الحمل فوق كتوفي

اشهد إن قلبك من احساس الوفا متوفّي
ما هقيت يكون هذا هو جزا معروفي

المواقف نورها بيّن لي المتخفّي
انكشف لي ما جهلته و الشكر لظروفي

ما خذيته من يمينك وافيٍ ومكفّي
لكن الله يعلم انك باقيٍ في جوفي