وين العرب و الغرب وحقوق الانسان ؟ - عبدالله العبدلي

انشهد إني من عنا الوقت مظروس
أدنات حاجه تظهر دموع الاعيان

وقتٍ صدوفه تضرب الحلم بالفوس
حتى يصير الحلم مكسور جنحان

الظلم ساد ولا بقى شي مدسوس
ربي فضح للناس حكام الاوطان

في سوريا تملى الجثث كل داعوس
وفي ليبيا عمّر معمّر إلى الآن

وين العرب عن فعل من يصفق الكوس
وشلون نسكت واهل الايمان تنهان

اللي يقطّع عرق الاسلام بالموس
يا كيف نظمن وقفته وقت الاكوان

نظام حزب البعث دايس ومديوس
يبيع دم الشعب بأقل الاثمان

حزبٍ على دين الولي كنّه السوس
ما يعترف باللي خلق كل ما كان

الجيش يستورد ذخاير من الروس
ويهلّها من فوقهم مثل الامزان

عشان يثبت بالحكم راحت نفوس
مافكّر يحرّك جيوشه إلجولان

شبيحته فوق القتل تاخذ فلوس
من غير حزبٍ جاه من قلب لبنان

شعبه غدا مابين ميّت ومحبوس
لكن بعد ربي ترا الشعب شجعان

ثبت وناخذ من مواقيفه دروس
لجل الكرامه كلّهم صاروا أخوان

وحنا خذينا الصمت و الخوف ملبوس
وين العرب و الغرب وحقوق الانسان؟

هذا ترا يا اهل الوفا شي ملموس
قلته وانا بالهم و الضيق مليان

© 2024 - موقع الشعر