هيَض هجوسي ما حصل قبل يومين
لوكنت ماني بالسياسه سياسي

شي ٍ يهز القلب ويبكي العين
وشلون عقب العز شفنا المئاسي

يا دار ما حنا عن العلم غاوين
ولا يأثر قول بعض الخياسي

حنا نبيع الروح من شان تبقين
والروح من دون البلد ما تقاسي

وحنا لبو ناصر جنودٍ موالين
بأمره يلين الصعب لو كان قاسي

وحنا على شانك نطب الميادين
ولا نبدل فيك عشرة جناسي

دام الولاء اللى من أول وللحين
مثل الذهب معدنه ماهو نحاسي

يمشي بدم الشعب وسط الشرايين
واللي يحاول يفرق الشعب خاسي

كنتي علينا تعطفين وتحنين
واليوم جر الشعب لحن التواسي

مدام دكتور القضى و المحاميين
اللى تغرب لك وذاق العماسي

عشان رايه طاح بين السكاكين
حسبي على اللي سبب الألتماسي

يا عبيد يا نسل الفهود الجسورين
مواقفك يا عبيد من فوق راسي

علمتنا بإن القناعه لها دين
وإن أتخاذ الرآي شي ٍ أساسي

في موقفك ماهبت حشد الكثيرين
مثل الجبل لو هبَت الريح راسي

حر ٍ كفخ للمرجله بالجناحين
ما رد راسه للخنع و الطفاسي

فعلك ينومس يا حفيد الميامين
كنك تقول إن الشجاعه لباسي

أسمك زهى بالطيب كل العناوين
والشعب بعدك زاد فيه الحماسي

ينصرك يا دكتور من نزل الدين
غصب ٍ عن أهل التفرقه و الخساسي


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر