لا قال مثلي سجته

لا قال مثلي سجته فالصّداير
يا هي ثقيل ٍ جابها له ثقيله

اقْريقريَ آنا طويل الشباير
ينهد حيل الناس مانهد حيله

ما قلت غير الحقّ والحقّ ناير
والحق ما يرضى سواتي بديله

لجل انّ شعري فالحقيقه مغاير
ولا جاري الا نادرين الطويله

ما هيب غرور ٍ نزعته بالظماير
والخيل يِظْهر قوّته في صهيله

شوف الأسد له هيبة ٍ بالزآير
والذيب لا من شاف ذيب ايعويله

بي طنخة ٍ ما مثلها بالعشاير
بي طنخة اللي كل قرم ٍ يجيله

ويْحلّ عقده في شَرَك كلّ حاير
والفضْل للي خصني بالفضيله

ما ني بحق الغير مجْحف وجاير
ما هو بنا اللي قال ما فيّ حيله

وما هو بنا من قال مالي مساير
والحرْف مثلي قاف لو يتكيله

وقّد لنار ٍ من صغار الشراير
كل ٍ بفكْره ميْز عقْله دليله

والشّعْر عندي طير حر ٍ وطاير
ما بكْفخ الّا طيْب تارك هزيله

والشعْر خالي من لسان النعاير
اللي تِشِبّ النار تِشْعِل فتيله

ابيات من عطر و نسيم العباير
يطْرب لها السامع مع اللي يشيله

يحْماني الله من نفوس الصغاير
يقاني الله من عيون ٍ عليله