ودي اجمّد وقتنا

الرمل والبحر والليل و وقتنا : يهمعك
دمع فرْح بشوفتك ودموع حزنٍ في سهاد

آتامّل سحر عينك واعجز انّي ارمعك
كيف قمرا وسطها لولو يميّزْه السواد !!

لو تناظر صخرةٍ خرسا بنورك تلمعك
من سنا خدّك تغار الشمس وتعاف البلاد

ارتويت بريح عطرك و انتشيت ب مدمعك
وما سكرت الّا بصوتك وانهبلتك بازدياد

جيتني وانا الكريم اللي خفوقه يطمعك
ما بغى من دنيته غيرك وغيرك ما اراد

شوف يدّيني بيدّينك ونبضي يسمعك
يرتوي بانفاس ثغرك فوق صفحاته مداد

بسكب احلى جملةٍ بالحب واروي مسمعك
وأطبع الحُب بْ خدودك واقطف أنفاسك حصاد

وأنتثر قدّام عينك ،، وانثرك ،، واجمّعك
واكتبك قصّة عشق ماجات في (بانت سعاد)

ليتني أقدر اجمّد كلّ لحظاتي معك
واحتفظ فيها لوقت الضيق في ليل البعاد

أو احطّك وسط صدري والضلوع تشمّعك
عن عيونٍ ما تخاف الله وتخلفك رماد

قلتها والحُب فايض في عيونٍ تدمعك
والضحا قرّب حضوره والوصل قرّب يباد