مقبرة عشاق

جاني بشير الحُب وانهى المسيره
في وسط عيرن شايله رووس الاشواق

حامل من اثواب الغرام وحريره
والقى بعضها فوق ظُلمات الاحداق

منْه البصر إرتد ويّا البصيره
واضحى غياب الشمس في عيني اشراق

دخلت مصر الشوق واسمع خريره
نيل المحبه فايضن حدّ الاغراق

جاني الحبيب وخطوته مستثيره
سيل المشاعر شتت الفكر اعراق

قال الهوى مكتوب في كل سيره
نظرة عشق تالي تجاريح وفراق

لكن هواكِ فكِ اسر السريره
عن وصف عينك وسْع تاريخنا ضاق

إنتي الوطن وانتي الحدود واميره
وإنتي الشرف من دونها قطع الاعناق

العين اضحت عند عينك كسيره
والقلب امسى خادمك جاك مشتاق

عدت دقايق بالفرح مستنيره
لكن عقاربها ورى سمها ازهاق

طالع يمينه قال.. بالقلب حيره
ودي بحبك لكن القلب مافاق

واقفى يتمتم بعدنا اليوم خيره
الحب حرمته الى لفة الساق

ناديت إبعد والفلك مايثيره
نجمن سقط منّه يجازيه باحراق

لكن قبل لاتغيب ودي تديره
امرالبشير اللي على الحب تواق

يرمي ثيابه لجل ارجع ضريره
ورحم الليالي يولد الفجر بارهاق

واحتاج قلبن واقف اليوم زيره
ماعاد يهوى رقصة دموع الامواق

بالمختصر بكتب عباره قصيره
حبر الكرامه ساكن بطون الاوراق

حبك بريح الموت فايح عبيره
وحبي قبر ضمه بمقْبرة عشاق