ياليل طولت بي والهم ذابحني - عدنان السلمي

ياليل طولت بي والهم ذابحني
يافجر تكفى تشيل الليل وتزيحه

الهم فالقلب قطعني وشرحني
والفكر ثابت لكن كثرة مراويحه

ياليت منهو معذبني يصارحني
وانا علي اتحمل ضلم تصريحه

وان كان مقصدك من صدك تمازحني
عطني من السالفه لو ربع تلميحه

ووعدك من بعدها ماعاد تلمحني
وش لي بشخصً(ن)قصد قلبي بتجريحه

كنت انتضر منك لو حاجه تفرحني
وماجبتلي غير لوعه من بعد صيحه

سلمتك القلب ابي منك تريحني
واثرك من اسباب تقطيعه وتشريحه

كنت اتحملك ترفعني وتطرحني
واليوم من طحت والطيحه هي الطيحه

© 2024 - موقع الشعر