ياهاجسي

ياهاجسي جاوبني ان كان ناديت
واجمع حروف الشعر من كل لوني

ياما طلبتك وانت بالجزل مديت
واطربت ناس(ن) فالشعرعاندوني

خلك وفي في مدتك كانك اعطيت
قبل البشر في مدتك ينقدوني

وانا ليا قلت الشعر ماتوانيت
فالوزن ولاالقاف ولااللحوني

جات القوافي في سراها وحييت
واخترت منها شي ماهو بدوني

وكتبتها في حب له ماضي مبيت
يمطر على قلبي سواة المزوني

وقمت اتنشد .. فالهوى ويش سويت
واجاوب لنفسي قبل ينشدوني

سجيت في دربي وانا يوم سجيت
قلبي وعقلي وافقو ماعصوني

ماشي ولا ادري وش حصلي ولفيت
اثر العقل والقلب يمه حدوني

درب(ن) ذكرت اني به سنين عديت
اواصل اللي كانو يواصلوني

صدفت بيت(ن) خابره ..ساكن البيت
وهلت دموعي يوم شفت الركوني

اللي لعبنا حولها واستمديت
حبن) يفرحني ليا زعلوني

ناديت لين انبح صوتي ولا اوحيت
واهله على بابه ولا جاوبوني

وقفت لين اني من الوقفه ارهيت
باصواتهم عند العرب يفضحوني

مليت من كثر التمني ومليت
من اهله اللي زودولي طعوني

انا بعدني حي لكن توفيت
وياليتهم وانا صغير اذبحوني

والموتر اللي جيت به يومني جيت
دقيت سلفه راحلن مازهموني

روحت وانااعتب..عشان ايش مريت؟
اجيه ازاور واهله يرجعوني!!

الظاهر اني غبت عنه وتباطيت
والظاهر اهله من خياله محوني

ياحب انا بنشدك وشلون خليت
طيف السعاده مايمر بعيوني

همي وصل حده وانا اقول ياليت
خلي يجيني قبل لاوصل جنوني

وليا ذكرته غالي الدمع هليت
واسج فالديره لاجل مايروني

ميت وذكره حي . وحي(ن) كماالميت
وانا اللي فقبرالحياه دفنوني!

انا اشهد اني في هواكم تماديت
وحتى القرايب فالهوى عاتبوني

ذا ماضي(ن) ماضي وانا بعده امضيت
ماعاد احب الا اللذي خلفوني