ياليل لاهنت ياليل النوى - غير معروف

ياليل لاهنت ياليل النوى .. ياليل مالك صباح
تسري نجومك ولاتسري ولايطري لك إنك تروح

ياليل ياليل شاخ الحزن وإستوطن خفوق الجراح
وأنته عسى الله يكافينيك مايكفيك مافيك ضوح

خيم ظلامك على أيامك علامك مانويت المَراح
ياشين مالك مدا وجهك بدا غامض ولالك وضوح

لانور شمسك نوى يشرق ولابرق الأمل فيك لاح
رمد سكونك على كونك ومجنونك يعد الجروح

ياشين ياشين ضاع العمر ضاع العمر والحظ طاح
ياشين ماعاد للدنيا طعم ماعاد للحلم روح

ياليل وش فيك ساكن حرك الساكن ترى العمر راح
إنفض رمالك عن أمالك ترى سر الحياه الطموح

ياليل ماقيل فالدنيا هذاك من الهموم إستراح
ياليل مير الهموم هموم مجروحٍ يصيح وينوح

ياليل عانه مكانه في غياهيبك يجر الصياح
صابر وعبرات عينه من مدامعها تهل وتفوح

© 2024 - موقع الشعر