يالله ياللي فوق عرشك تعليت - بندر بن حسين المرشدي

يالله ياللي فوق عرشك تعليت
تلطف بحالي ياكريم وتعينه

من جلستي في داخل البيت مليت
كن الخفير الباب وانا سجينه

ايضيق صدري كل ماصبحت ومسيت
وعن مابقلبي مادروا عاذلينه

اليوم من عصر الحضاره تعنيت
ما عاد اميز بين زينه وشينه

عصراً يشتت شمل الاخوان تشتيت
عساه ماتبطي علينا سنينه

وقتي تردا بس انا ما ترديت
عزمي عواكيس الدهر ما تهينه

امشي على نهج العرب ما تعديت
وخليت سلم الغرب لمقلدينه

انا على حب البداوه تربيت
وقلبي على الماضي تزايد حنينه

ودي بروضً فيه ياما تمشيت
مليت من زحمة قصور المدينه

لاجيت في ريضان نجدً تعافيت
يجلى حزن نفساً من اول حزينه

والبل وشوف النار في ربعة البيت
امسودسن لاهل الكرم ناصبينه

يحرم عليه غيرها ما تمنيت
وعمر البنادم للفنا خابرينه

كتبت مافي داخل الصدر وابديت
وعسى مطر خطي يشوفه بعينه

هيّض عليه منزلاً يوم مريت
كنا من اول يا مطر نازلينه

عنده وقفت وصافي الدمع هليت
والكف قمت اصفق يساره يمينه

ورحت اسأله ما شفت والا توحيت
اللي سكنك العام هالحين وينه

اتلا العهد به يوم قفا وقفيت
وحل الفراق وحال بيني وبينه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر