نبي نسير والليالي تصاريف
العمر مقفي والليالي مقيمات
لاذعذع الغربي وساوق له الهيف
يجلي همومن مرمسات خفيات
الراس يابس واللياي مناشيف
والوقت ضد مقدرين الطناخات
هقوات غازي ماتعود مناكيف
والوقت مايشجع على كل هقوات
سج القدم مابه عليه تكاليف
في ذمتي مابه عليه صعيبات
والله وانا صادق بكل المحاليف
بشوفك يابو مشعل تزيد الوناسات
عزمني الطيب وانا ماني بضيف
هي ابرك الحزات عن كل حزات
راعي دلال في وجاره مراديف
فنجالهن يقعد خوى الراس مرات
هن كيف من يطري على راسه الكيف
ياخذ بها المهموم وقفه وسجات
في مجلسن تزين فيه السواليف
ان كان تبغى للعلوم الحشيمات
طيبه على ساسه مهو طيب تزييف
ماهو بطيب اهل العلوم الجديدات
ماهو رياء ولا مهايط وتهديف
اللي على الشاشات صاروا بشاوات
مخضب السكين ومخضب السيف
الياهرجنا بالفعول الصحيحات
مايجحد المعروف واهل معاريف
فكاك من ضاقت عليه الوسيعات
وانا على قل السنين المهاديف
اخذت من بعض التجارب شهادات
ماخاوي الا من يعد المشاريف
اللي هواء باله وصول المنيفات
خوة سعد تفوق كل التواصيف
بذات لامني تذكرت بذات
في خوة الطيب تبين المواقيف
تلقى معه لاعاند الوقت فزعات
وراع المصالح مقفي عنه ومعيف
تميزه لو كان مابه علامات
تمت وانا في صرف الابيات حريف
وزن الذهب في صرف حمر الجنيهات
الشاعر غازي بن رويعي الوهبي الحربي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين