طعون الاقراب - سليمان السلمي

ماشد من طعنه من كفوف الأقراب
اللي مع الايام مايمكن تطيب

لوكنت تخفيها عن عيون الاجناب
يبقى لها بين المحاني لواهيب

وأنا من طعون القريبين منصاب
شفني شباب وبان في راسي الشيب

الحال صحرا وأقرب الناس حطاب
والدهر ماصلح ما أفسدوه الحواطيب

ربعي عليه صارو جموع وأحزاب
كني مسوي شي به منكر وعيب

ليا ضحكت قبالهم صرت كذاب
واسهومهم لاقفيت ماتخطي تصيب

لكن مسامح دامها طعنة أصحاب
كلي فدا ربعي طوال الأشانيب

وإنكانها شعر وتفاخر بالانساب
أنا "سليمان الفهد" وارث الطيب

شاعر وليه بالشعر مخلب وناب
والفضل لله ماحدن له مطاليب

يعرفني أمير القصيم ولي أحباب
وكثرو جماهيري من بعيد وقريب

ومدام طعناتي من كفوف الاقراب
يستاهلون الربع كلي مواجيب

الله يسامحهم على كل الاسباب
ويهديم المولى ويستر من الغيب

يبقى غلاهم داخل القلب بكتاب
ماينتهي يالين عرض المكاتيب

© 2024 - موقع الشعر