سالفة نوره - سليمان السلمي

مهدود حيلي من الصدمات يانوره
لاتسأليني علومك وش هو اخرها

الحال مكسور والاوراق منثوره
على رصيف الزمان اللي مبعثرها

جنبت عرجا وطاح الحظ في عوره
ولاينفع العين لو هلت عبايرها

الامس جمره ورى الاضلاع مسعوره
واليوم زاد الحطب والغد فجرها

والوقت بيتن به الاحلام مقبوره
وتعيش لاخلت الموتى مقابرها

والحفرة اللي بنيت سوء محفورة
ماطاح فيها سوى من كان حافرها

يطري عليه سنين الحب وشهوره
اللي قضت بين جنبها وسايرها

وافك بين الحنايا سجن عصفوره
واطلق عنان القصايد يوم اسطرها

يابنت ارضك ماهي بالشوق ممطوره
ماني غريبن عليها زين خابرها

مريتها بالربيع وجفت زهوره
وشلون اجيها وصيف الموت حاصرها

معاك شفت العنى بالصوت والصورة
وانا جروح المحبة عنك ذاخرها

دورت غيرك وقلبي دور سروره
وضيعت عمري وانا الفرحه ادورها

جنيت من تضحياتي قصة اسطوره
وجنيت من عزوتي اخطر خناجرها

وجنيت بالشعر عشاقه وجمهوره
وكتبت اسمي وسط صفحة دفاترها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر