مسكين يالي غرته زين الازوال

حي الرجال اهل القلوب النظيفه
الي على الجزلات يضرب بها امثال

شروا ابو تركي على الطيب كيفه
الصاحب الي للصعيبات حلّال

غالي وقدره فالجبال المنيفه
ونسوق له من غالي الكيف فنجال

يامرحبا ترحيبتن مستضيفه
بالعود والريحان ياطيب الفال

اجيك لو ان المسافه كليفه
تستاهل العنوه على طيب واجلال

وان غبت تبقى فالضلوع المريفه
وقلوبنا متواصله بث الارسال

قربك ولا قرب النفوس الضعيفه
الي ما منها فود ولا تشرح البال

لابارك الله فالوجيه السخيفه
اصحاب بس يامرحبا كيف الاحوال

و ليا بغيته فالمواقيف جيفه
ياخيبة اُمٍ علقت فيه الامال

عشنا وشفنا والليالي مخيفه
يالله دخيلك من بلا كل غربال

هذا الزمن بيّن بصدقه وزيفه
و مسكين يالي غرته زين الازوال

ما كل عذرا فالحقيقه عفيفه
و لا كل من حاف الدواوين رجّال

و يا صاحبي ما كل حمله خفيفه
بعض الحمول ثقال تبغى لها رجال

الطيب تعطي لو بحاله كسيفه
والمرجله توقف مواقيف الابطال

و من لايطيع الله ونفسه شريفه
ماينفعه لو يفعل افعال وافعال

وسلامتكم