دار الفكر مع هجعة المستريحين - خليل بن هدلان

دار الفكر مع هجعة المستريحين
وابحر بي الهاجوس في بحر الالهام

وكتبت شعر فارقٍ بالمضامين
وعبرت عن شيٍ بصدري من العام

شاعر ولي بالشعر نهج وقوانين
وقصايدي ماهيب في حاجة اعلام

شعرٍ يقدم في صدور الدواوين
ويطرب لعده كل وافي وضرغام

معانيٍ ترجح بكل الموازين
ماهي حكايا خايب وهرج نمام

امشي على نهج الرجال العزيزين
كل ارجحٍ في منهج العز مقدام

ولا اتسموى لي بناسٍ بعيدين
اسمي مشرفني على طول الايام

ولا ارافق الا الطيبين الميامين
اهل العوايد والمراجل والاقدام

وابعد مجالي عن مجال الرديين
ولا ابعدت عن الانذال مانيب منلام

رفقة رخوم الناس لو كان يومين
تحصد نتايجها ردى عشرة اعوام

واهل الحسد لو تنعق يسار ويمين
في كل درب ادوسها تحت الاقدام

واليا حكى فيني من الناس مسكين
ماهو منقص قيمتي هرجة خمام

مادام لي في ذروة المجد تمكين
وكفي على كسب النواميس عزام

القى المدايح من رجالٍ مسمين
اهل الفعول اللي مدايحهم وسام

وترى الضعيف من اول الوقت للحين
دايم خلاف الناس ماهوب قدام

كل الملا عن منهج اللاش دارين
من شبته في غبة الحكي عوام

كنه بشذب الناس يربح ملايين
على الهروج الضايعه يضرم اضرام

ياما اعترض له بالمجالس مقفين
يذرع لسانٍ بالمخاليق ذمام

يمقت عباد الله على الشين والزين
من اليمن للشرق للغرب للشام

ويمدح لروحه راعي المنهج الشين
و يسرد علومٍ كنها بعض الافلام

ويعد نفسه وين وان سيرته وين
ضعيف راي وغرته بعض الاوهام

متخيل انه من حساب السلاطين
ما يدري انه ينحسب ضمن الاقزام

قصير شبرٍ لا غدا العلم علمين
لا نومس اصحابه ولا ضد الاخصام

وطير الرخم لو كان يملك جناحين
ما صاد صيدٍ يعجب العين لو حام

والفرق واضح بين روس وكراعين
فارقهم اللي جاعلٍ خلقه اقسام

ومن ضيع حقوقٍ عليها براهين
يعيش عمره طول الايام منضام

ومن لا جمع بيض الفعايل مع الدين
اخطى مناهيج الرجوله والاسلام

© 2024 - موقع الشعر