كـنـز حـنـيـه

ياللي بجوالي اسمك كنز حنيّه
لك خافقي كنز حب وْلا هو بْفاني

يوم اني بْعيد عنك الحال مرثيّه
واعيش يوم ان صوتك يطرب آذاني

وآقول لك طيب وْمرتاح نفسيّه
ونا قبل لسْمِعِك مابانت اسناني

والحين جيتك معي أبيات مهديّه
فوق الهديه من احساسي ووجداني

أبيات مثل الهديه ميّه الميّه
ماهيب تصدا أبد مع مر الازماني

من منجم القلب مسبوكه محليّه
لك يامن عْيونك وْقلبك هي اوطاني

فيها أقول : ان حبك فعلته فيّه
يدق به قلبي وْيلهج به لْساني

أكبر ويكبر معي في كل فجريّه
حبي لك اللي يرجّح كل ميزاني

جيتك وشوقي لشوفك سبة الجيّه
حبّيت راسك ويدك وْراحت احزاني

يايمه رْضاك مكسب مايجي زيّه
لامن لقيته كسبت ارزاق وجْناني