ملذة شياطين

حسيت بك واحسست باللي تودين
وانا ادري انك ناويتلك نوايا

لكن ترى ماني من اللي تحبين
ولاني علي كيفك وكيف الصبايا

يا بنت ياللي كل يومن تسجين
وفي كل يومن لك علوم وحكايا

انا ولد قرمن صعوط المجانين
وآرد علي حوض الشقى والمنايا

ممشي مع السيسان وانطح ملايين
ولاركن مع الانذال بين الزوايا

وماني ترى والله من اللي تلدين
يمه ويروي لك كبودن ضمايا

طايش ولاهمه سوى داعج العين
يفرش لكي من زود مابه هدايا

ماهو بحب الا ملذة شياطين
واحساس لو مكًن يسوي سوايا

يلعب معك لعبه علي حد سكين
ويلبَسك ما تدري ذنوب وخطايا

من عقبها لو ثار قلبك براكين
ما ايقول غير اني عطيتك عطايا

ما ايذكرك بالحب والود واللين
الا يزيد الكي .. كي ... وكوايا

في وقتها قولي وش اللي تسوين
ما يسترك لبسك ولبس العبايا