شياطين الفضا

بديت بْإسم رحمن ٍ .. عليم الحال وأْموره
فسبحانه عدد خلقه وآياته .. ومقدوره

أنا العبد الذليل اللي ركع والا سجد طايع
على سنّة نبي الله (محمّد) .. ليتنا نْزوره

يا ربي جيتلك خايف .. من اللي شفت واذهلني
يا ربّي لطفك وْ عفوك رأيت الناس مخموره .. !!

وانا صايم بشهر الخير .. ادوّر بس غفرانك
بلاني يا إله الكون .. عبيد ابليس .. جمهوره

على الشاشه اشوف الذل والخذلان يا ربّي
اوادم همّها الأموال .. تطيع ابليس وتْشوره

مؤذّن بيتك الطاهر ينادي للصلاة الحين
وربْع ابليس تستهزئ .. بحجّة كاذب وْ زوره

تجي بنت الهوا ترقص .. لعزف ابليس وتْغنّي
بلا حشمه بلا عفّه .. وتكشف للملا العوره .. !!

تبي ترضي معزّبها !! وتعصي خالق الدنيا !!
تبي تفتن جميع الناس .. عشان تْصير مشهوره .. !!

شياطين الفضا ترسل .. خبيث الفكْر للمسلم
شباب المجتمع حاله .. يبكّي الأرض وصخوره

(أخي المسلم) تقرّب من إلهك واترك اهوائك
وطيع الله واستغفر .. وتلقى النفس مسروره

الا يالله تهدينا .. تعزّ بْعزّك الأمّه
وتنصرنا على الطاغوت .. ودينك يشرق بْنوره .. !!

بنرفع راية الإسلام .. إلى ما شئت يا ربّي
الا يا ربّ غفرانك .. لعبد ٍ تمّ مضموره .. !!