ما علينا مشاريه

من غاب من كيفه وكيفه يوديه
خليه في كيفه هْو ادرى بحاله

واجب علينا نسئله خير وش فيه
مبطي غيابك ما فقدنا لحاله

ياللي رحلتي ما علينا مشاريه
طبع الوفا فينا تعدى مجاله

بعض البشر لو مات مايوم نرثيه
يرحل وحنا ما نشدنا بداله

ولا انت ياللي إفتقدنا مواطيه
وصلك قطعتي ما رحمتي حباله

تنسى محبٍٍ لك مودٍٍّ وتجفيه
ثار وتأجّج في هجوسه مقاله

صرحك بنيته فوق راسي تهدّيه
عيبي خفوقي لك تعنّى وصاله

ياللي رحلتي دوك حرفي وداريه
واقرا تمعّن لا تْمرّه عجاله

شاعر وقافي لك مشاعر تمشيه
زاد و تجلّى في جنابك جماله

ومن غاب من كيفه على خير خلّيه
يومي يعدّي والليالي تواله