ناقصـات المشاريه - محمد العثمان

ياسعود مالي بناقصات المشاريه
مبطي ونفسي مايعالج كدرها

ياسعود اخوك ان ساق جملة مباديه
طار الكرى والعين زؤد سهرها

والراس لامن شاش..!! قلبي يهديه
يرسل من اللي بالضماير قهرها

تزعج معاليق الحشا ماتخليه
يركد ويسلا مانشد عن خبرها

مار البلاء ياسعود لو جيت ابجليه
دلا يتكاثر بالكبود وحشرها

واهتاض جاشي ثم ضاقت عراويه
واعمى البصيره عن مكارم بصرها

وحرٍك وريدٍ ثار باوسط مجاريه
دم الخلايا واعلنت عن خطرها

افيه من طرد التفاكير افيه
جر الهموم النازحه ماقصرها

والا الحكي ياسعود بانت خوافيه
عند اللي (بيض النوايا) دمرها

مبطي وانا في ضيقتي دوم اسليه
لاصفر وجهي بيض سنه كشرها

يفرح بطيحت قدم ساقي واخليه
واقول مالي في علومٍ فسرها

بس اللذي حدن على مابدأ فيه؟؟
من دبرةٍ وشلون مثله دبرها؟؟

وصفت معه حساد دلًت تباريه
واهل الشماته ورًدت من نهرها

(ميٍ هماااج ولاقدرنا نصفيه)
يحير في عمق النفوس وبحرها

ناسٍ تحد الحق من دون راعيه
يالله تجعل كيدها في نحرها

(قومٍ عواجه مالحقنا تواليه)
يالله انا طالبك تقطع بذرها

ادعي على من بي كثرت دعاويه
بالزيف جمع مابنفسه نشرها

والله ماني عاجزٍ لاوطيه
مع الرخوم اللي قصيرٍ شبرها

ترجع ويرجع خايباتٍ هقاويه
يقفي معاها يتبعه في اثرها

ياسعود .. لولا الدم؟؟ والله فلا اعطيه
لكن ابستر غيبها عن جهرها

© 2024 - موقع الشعر