الطيب

لـ سعد بن هادي، ، في غير مُحدد

الطيب - سعد بن هادي

الرّجْل لا منّه هوى بعيوبه
عند الرجال .. اكيد ماله توبة!!

من ينفعه ما دام قد ذا جَهده؟؟
من يستره.. ما دام يشلع ثوبه؟؟

لو هو ولد حرٍ عريب المجنى
ما فادته ..يمكن تزيد عقوبة!!

يولد.. وتاج العز كاسي راسه
وقبل يحبي .. حطه ورى عرقوبه!!

هو ما درى بإن السنين تلفه!!
وان البنادم عايشٍ باكذوبة!!

وإن خطوته .. وان وقفته .. ما تنسى!!
وإن كلمته قبل يهرج محسوبة!!

النفس تفنى ..والمواقف تبقى
وكلٍ على متنه يشيل ذنوبه

ما هو بذا جدي.. وهذا جدك
إلاّ.. فعل راسٍٍ يعرف دروبه

لا يا الردي ..كانك نويت بغدرك
فاحذر.. تجي بيد الغدر لعبوبة!!

الغدر بندق ..غير لا من ثوّر
يثور في راعيه قبل حروبه!!

والطيب وان كانه بقى بجرابه
ما والله الوافي نسى ماجوبه

الطيب سيفٍ في النوايب يظهر
يثبت.. وتبقى رايته منصوبة

لكن قبل السيف.. وين اليمنى؟؟
اللي تعز الرجل وقت كروبه

سيفٍ بلا يمنى..تراه أبرك له
لو هو مع القينات واتسلوبه!!

يا حر مد أم الشحم .. واصبر له
لو كان ولد اللاش يفرح نوبة

ترى الصبر بين المطيح وبينه
كنه الحبيب اليا فقد محبوبه

من يحسب إن الخلق ترفع قدره
لا صار شيخٍ.. شيخته بجيوبه!!

بقول له عرقٍ لزوم يرده
ويبين لا من البشر صاحوبه

وان قلت لي قول العرب من قبلي
وان الكرم للرجل ..دون عيوبه!!

بقول لك وقف !! وخذها مني ..
وصيةٍ مسموعةٍ مكتوبة

لو الكرم.. شيخٍ .. ميقدم ربعه
وشلون يقدم .. والردى عذروبه!!

هذاك مثل اللي عطا بيساره
حتى لو احتجته .. ما تلفي صوبه!!

© 2024 - موقع الشعر