جاري الفلك !! - هزاع الشيباني

يالآدمي في رحلة العمر ما اجهلك!!
ياللي حملت عن الجبال الآمانة

ابليس بجنوده ليا من تورسلك
ورَدك بذنوبك لحوض الاهانة

كم مرةٍ عن قمة المجد نزَلك
في نزوةٍٍ طاوعت فيها هوانه

خَلاك تعصى اللي له العرش والملك
ياللي حياتك كلبوها عشانه

لازم يطابق ظاهر القول داخلك
والمرء كلمة تنكبه من لسانه

واعرف ترى لا اصبحت فالصبح: ( ممهلك )
امدَخل الابرار عالي جنانه

اجعل نصب عينيك يالعابر: آجلك
من شان تاخذ حيطتك قبل آوانه

خلَ الذي عن طاعة الله مشغلك
ما ينفعك يوم الحشر والإدانة

ولا تحتري لا ملت شخصٍ يعدَلك
كلٍ على ماقيل يسرج حصانه

لاشك به قومٍ على الخير تحملك
صحبة ولا تاصل مداها الخيانة

بالنصح والإرشاد دايم تعاملك
ميانةٍ يا حيَها من ميانة

آخير من ممشاٍ مع اللي يضللك
لا اخطيت ما يخبرك : خبث ولعانة !!

وفي غيبتك مع نايد النَاس ياكلك
بلسانه اللي ما يجوَد عنانه

طبع الرَدي يفرح لكثرت مشاكلك
اعرض عنه لاهنت // خلَه وشانه

تبقى عزيز النَفس وايصير منزلك
فوق الجدي سامي رفيع المكانة

وخلَك مثل بحرٍ حمل جاري الفلك
سرَه عميق ويرهبك بهيجانه

والجود صفق الموج باخرك واولك
واتشوفك العالم : وسيع البطانة

والكلمة اللي من لسانك تمثلك
والفايز اللي عن خنا الهرج صانه

اقبل كلام اللي على الطيب زاملك
عابر سبيل ومغترب في زمانه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر