خشف ريم

ويسعد الله صباحك يسعد الله مساك
يا خشف ريمٍ من التحنان جيت أسألك

بالله ليه التنائي من يديني خذاك؟
وأصبحت صعبٍ بعد ما كنت مستسهلك

أوّاه لبّى ثراك أوّاه لبّى سماك
وشلون أشوفك وأنا عجزت لا اتخيّلك

أغليك لكن عسى الله ما يبيّن غلاك
وأكبر دليل : (أرسمك وأقوم وأقبّلك)

أحييك وأحيا معك وأفنيك وأفنا وراك
وأجفاك وأوصلك وأزعل منك وأزعّلك

أموت فيك وعليك ومنك وأدمح خطاك
وأذكرك وأنساك وأسلا عنك وأشتاق لك

يلومني فيك من هو ما تنفّس هواك
ولا على موعد العشّاق يستعجلك

يا سيّدي لا تلوم الغيّ يوم احتواك
عساه من آخرك يقدر يجيب أوّلك

ساعة قباب الذهب ضمّة غصون الأراك
من علو صدرك ونادى لليان أسفلك

سال الندى من على جيدك وقبّل شذاك
حتى ترائبك غارت من عطر مغزلك

والثوب الأحمر يثير الصمت يومه غشاك
وسجنجلك مات فيك وهوّ يتأمّلك

كلك حلا جلّ من كمّل بعيني حلاك
الزين من منهلك والسحر من منهلك

صوتك . سوالفك . طبعك . معدنك . مستواك
تعجز حروف الثنا لا جات تسترسلك

فداك قلبي وما في وسط قلبي فداك
يا من عن أزهار غيرك شاقني حنظلك

خذني ملك ما يدوّر غير لاما ملاك
والله يجيب الملاك اللي عشقها ملك