تنادي مشاري - مشاري البابطين

كنت أظن الحب في صدري متداري
لين شفتك تنوي وداع (ن) اخير

وقتها ميّزت وش معنى قراري
يوم اخبّي حب (ن) بقلبي كبير

ناوي الفرقا وانا الصمت اختياري
وأدري اللي ماانكتب دايم عسير

لاتلوم ولاتشرّه وانت داري
ان موتي اهون ولاابقى كسير

اذكرك يوم انك تنادي مشاري
وقتها ماكنت اشاور بك شوير

كنت مالك داخلي حب (ن) مجاري
كنت مالك عندي بالدنيا خشير

وصرت كنّي معك تايه في صحاري
لالقيت الدرب ويصلاني الهجير

حب صامت .. شوق جامح .. جرح عاري
ماضي (ن) مؤلم ومستقبل خطير

روح تشكي .. عين تبكي .. ليل ساري
شاعر بحزنه قضى ليله سهير

كان هذا الحب بايع ماني شاري
من هو اللي يشتري جمر وسعير

ليه اشوف إن الغلا عندك طواري
لاطرى لك جيت وإلاّ مايصير

ماتركتك طامح برّد اعتباري
لان قدرك للأسف اصبح صغير

لاتعذّر ... ولاتقبل أعتذاري
رح بفالك رح عسى دربك سفير

© 2024 - موقع الشعر